Home ديكور المنزل طريقة فرش شقة العروسة بسهولة

طريقة فرش شقة العروسة بسهولة

0
0
185
11

طريقة فرش شقة العروسة كل عروسة عايزة تفرش شقتها مش عارفة تبدأ باة ولا اية موقعنا الاسرة والطفل حيعرفك

طريقة فرش شقة العروسة بسهولة والف مبروك لكل عروسة

طريقة فرش شقة العروسة

طريقة فرش شقة العروسة

اولا كده متكتريش اوى ف الناس اللى هتاخديها تفرش

يعنى انتى واختك واتنين او تلاته من صحابك ومامك ومتكتريش عن كده عشان متبقاش الدنيا هيصه

وتبقى مركزه معاهم وهما بيرصوا..
وكمان حاولى يكون ذوقهم وستايلهم زيك عشان يسهلوا المأموريه عليكى

كمان يفضل متاخدوش اى اطفال معاكم

يعنى لو اختك او حد من صحباتك عنده اطفال بلاش يجيبهم لان طبعا هيبهدلوا الدنيا

وانتى رايحه تجيبى اى اكل سريع او من البيت ليكم
لان حوار الفرش ده بيتأخر ومش معقول هتجوعى الناس اللى انتى واخداها

وكمان مش معقول هتطبخى ف حاجتك الجديده
اما الميه عادى ممكن تجيبى ازايز فاضيه من البيت وتملوها وتحطوها ف الثلاجة لان كده كده هنشغل التلاجه عادى
كمان خدى معاكى بيجاما او عبايه قديمه شويه عشان تلبسيها وانتى بتفرشى

وفى حاله لو حد من قرايب العريس جاى يفرش معاكو خدى عبايه حلوه البسيها زى بعضه

عشان المنظر العام بس

المستلزمات وادوات النظافه اللى هتاخديها معاكى

خدى كيس اريال الحجم الكبير وخدى بريل وخدى سفنجه مواعين وخدى جلانس وبخاخه فاضيه لو امكن

وياريت لو ديتول او اى مطهر
والحجات دى

ملهاش علاقه بأدوات نظافتك

يعنى مش هنقرب لادوات نظافه جهازك

دول خارج الحسابات
وخدى فوط مطبخ نظيفه وورق جرايد

اما المقشه والزعافه والمساحه ممكن تستعملى بتوعك عادى مش هتفرق

وممكن كمان تستعملى جردل النظافه ابو شرشوبه لو مضحيه اوى

وكمان عدى على محل بلاستيكات زى الشطوره وهاتيلك رول مفارش فضى او دهبى حسب ذوقك لان هنحتاجه لفرش المطبخ ودولاب اوضه النوم وبوفيه السفره من تحت

واماكن تانيه كتير

دلوقتى وصلتوا الشقه

هتدخلوا وتبدأوا تقسموا المهام
يعنى فلانه ف المطبخ فلانه ف النوم
ولو انى افضل ان اوضه النوم انتى اللى تفرشيها وترصى حاجتك بنفسك
ليه؟
اولا لان فيها متعلقاتكم الشخصيه انتى وجوزك وميصحش حد يطلع عليها
وكمان لان الهدوم دى زى حاجه المطبخ هتستعمليها كل يوم ومش معقول كل لماتحتاجى حاجه تسألى مكانها فين ولو الامر كان صعب عليكى خلى حد قريب يساعدك مامتك اختك المهم انك تكونى موجوده

و بالنسبه للستاير الخفيفه او لو عندك براويز للشقه هتتعلق او تتركب تركبى وتعلقى كل ده قبل التنظيف
لان دق البراويز ممكن يبهدل الدنيا شويه
والستائر لو متعلقه لميها على فوق كده وممكن تغطيها بملايه قديمه كده عشان متتعفرش

وهنبدأ

طريقة فرش شقة العروسة

بحجرة النوم

طريقة فرش شقة العروسة

لان فيها شغل كتير زى رص الدولاب
وطبعا احرصى انك تقسمى الدولاب بالعدل بينك وبين زوجك
يعنى هو ربع وانتى تلات ارباع
نظرا لان حاجتك كتيره عنه طبعا
وبفوطه نظيفه كده امسحى ارفف الدولاب

هاتى بقى رول المفاارش وقسميها على ارفف الدولاب وكرريها وقصيها مره واحده

يعنى تاخدى مقاس رف واحد وتحطى عالرول كزا مره لحد ما تقصى العدد المطلوب

وافرشيها بقى وابدأى ف الرص وانتى وزوقك فيه

ولية عودة معاكم فى رص الدولاب
وانا شخصيا افضل ان ملاياتك وكوفرتاتك تكون فوق

اما هدومك والفوط تكون قريبه لايدك اما البطاطين واللحاف والمفارش بتوعك حسب مساحه دولابك
لو اخدها خير وبركه ماخدش يبقى تحت السرير
او فى دولاب اوضه الاطفال لو جايباها
وكمان احرصى على تعدد الالون ف الرص يعنى خليه شكله مبهر لما جوزك يفتح الدولاب كده

اما بالنسبة للشوفنيرة

اللى بتيجى مع اوضة النوم
ممكن

نستخدمها لرص شويه حجات خفيفه

زى شرابات جوزك ممكن طرحك ومن تحت كمان ممكن تستغليهم ف التخزين

وممكن تحطى عليه من فوق تلفزيون صغير ويبقى زى مكتبه ف اوضه النوم
ندخل بقى

عالتسريحه

كيفية فرش شقة العروسة, ازاي العروسة تفرش شقتها, فرش شقة العروسة, فرش الشقة الجديدة, فرش بيت العروسة

امسحيها وامسحى المرايا بملع اللى جبناه وافرشي مفارشك ورصى الميك اب وحاجتك فيها واحرصى على تنوع الحجات اللى بترصيها مش الكميه

يعنى لو جايبه علبتين ايشادو كبار مش لازم تحطى الاتنين كفايه واحده وكذلك لو جايبه اقلام تحديد او كحل مش لازم نرص كله

هو مش معرض ياعروستنا

واعرفى دايما ان الرقه مطلوبه

ادراج التسريحه كمان استغليها ف رص باقى الميك اب وادوات عنايتك الشخصيه واى متعلقات ليكى او له

وكمان عندك

الكوميدينو

ممكن نستغله ف تخزين اى حاجه

ومن فوق طبعا هنمسحه ونفرش المفارش

وعلى مزاجك تحطى اباجوره او متحطيش حسب ذوقك

كيفية فرش شقة العروسة, ازاي العروسة تفرش شقتها, فرش شقة العروسة, فرش الشقة الجديدة, فرش بيت العروسة
وده منصحش انك تفرشيه قبلها بفتره

يعنى يتفرش قبلها بيوم او يومين بالكتير عشان المفرش مش يتبهدل

وكده خلصنا رص اكنسي الاوضه بقى

وامسحيها

اما فرش مشايات النوم او السجاد كمان خليها قبلها بيوم او اتنين

وكده خلصنا من اوضه النوم

طريقة فرش شقة العروسة

اوضة الاطفال

طريقة فرش شقة العروسة

هنضفها كويس ونفرش الملايات والمفارش بتوعها لو جايبين ونفرش دولابها بمفارش وممكن نرص فيه اى حاجه زايده عن اوضه النوم بتاعتك
ونحط انتيكاتها
ونمسحها

ونفرش سجادها او مشاياتها ونكنسها بالمكنسه ونقفلها
ندخل على

اوضة السفرة

وطبعا دى بتاخد موال ف الرص
هنبدأ بالبوفية او الباار

برده هتفتحى البوفيه وتمسحيه بفوطه وتفرشي مفارشك البلاستيك وتحطيها ف الادراج وفى البوفية من تحت
وابدئى برص البوفيه
وابدئى بطقمك الصينى
لييييه؟
اولا عشان كرتونته كبيره وواخد مساحه ومعطل المرور
ثانيا عشان نستغل كرتونته اننا نجمع فيها باقى الكراتين الفاضيه اللى هنفتحها او اى ورق بيطلع
وهنرص معظم الصينى ف البوفيه
ونخلى حجات بسيطه للنيش على جنب يعنى طبقين من كل حجم وطقم الشاى والقهوه والسوسييره او سلطانيه الشوربه الكبيييييييره اللى بتتحط ف النص دى ههههه
والباقى ف البوفيه
وهنرص فيه اى اطقم مينفعش تترص ف النيش او زايده عن النيش وده حسب حاجتك
ادراج البوفيه رصى فيها اجزاء من شنطه المعالق لو ملهاش مكان
او رصى فيها اطقم معالق فردانيه قيمه كده مثلا
او ترصى اى حاجه تحبيها

طريقة فرش شقة العروسة

النيش

طريقة فرش شقة العروسة

هتمسحى ارففه بملمع الزجاج من بره ومن جوه وتمسحى الخشب بملمع الخشب
وتفرشي مفارش النيش
الشيك او ممكن لما تخلصى تحطى ورد مجفف ف الاركان وفى النص
وتبدئى ترصى كاساتك القيمه فقط

مش كل كاساتك وكذلك طقم الشربات والخشاف والقهوه والشاى

وتكون كلها حاجات شيك وقيمه
وبلاش تكلكعى ف الرص النيش بالذات كل ما يفضى ينور كده ويبقى اجمل
وهنحط ف النص جزء الصينى اللى احنا سيبناه ع جنب
وزينيه بكريستالات وانتيكات صغننه كده
وبعد مانخلص نقفل النيش بالراحه
ندخل على

طرابيزه السفره نفسها

نفض كراسيها كويس
ونلمع السفره ونفرش مفرشها
ونحط انتيكاتنا

عالبوفيه وعالسفره
اما سجاده السفرة
طبعا المفترض انها تتحط قبل السفره ولو مش حطينها
هنمسح
ونفرشها ونكنس بالمكنسه الكهربائيه
ونقفل الاوضه
ده لو كانت السفره ف اوضه
لو السفره مفتوحه ع ريسبشن
يبقى نخلى المسح كله مع بعضه

طريقة فرش شقة العروسة

وندخل ع الريسبشن او الانترية او الركنة

طريقة فرش شقة العروسة

ع حسب شقتك
هتنضفى الكنب بالراحه كده وترصى
الخداديات وتمسحى الطرابيزه اللى ف النص وتفرشي مفرشها
وتمسحى مكتبه التليفزيون
وتمسحى التلفزيون وتفرشى مفارش فيها ورصى انتيكاتك فيها او كتب اى حطى الريسيفر او اى جهاز عندك
لو جايبه ال سى دى يبقى تمسحيه وبس كده
وهنمسح الاوضه

ونفرشها بالسجاد لو حابين ونكنسها بالمكنسة الكهربائية ونحط اخيرا الانتيكات على الترابيزه

وتذكرى دايما ان الرقه مطلوبه

 ندخل ع الصالون

ومش هيختلف كتير

هننفضه بالراحه ونمسح الجراندات اللى عالجنبين لو جايبه

او تمسحى الاباجورات لو جايبه وزى ما حفظتم

نمسحها
ونفرش السجاده ونكنس بالمكنسه

وف الاخر نمسح الترابيزه ونحط مفرش الصالون وانتيكاتك
ونقفل الصالون

فى هذه الاثناء هيكون المطبخ بيترص

واحرصى انك تكونى عارفه مكان كل معلقه فيه

وطبعا هنظف الارفف والادراج ونمسح الخشب او الالوميتال من بره

ونفرش مفارشنا ونبدأ نرص وعلى حسب حاجتك وكمياتها

والاجهزه اللى جايباها

وحجم مطبخك

كل ده انتى ادرى بيه

بس عامه حاولى متكركبيش فيه اوى لانك بتقضى فيه نص عمرك تقريبا

ولانه هيغنيكى عن بهدله الشقه لو حبيتى تاكلو فيه

وحاولى تبقى الحجات اللى هتستخدميها ع طول تبقى تحت ايدك وقريبه منك زى

الخلاط

طقم توزيع

طقم توابل

حامل مجات

الصوانى

ورصى بقى تلاجتك ورصى التوابل والخزين

واطقم الحلل والصوانى تبقى تحت ف التقفيله

المقشات والمساحه ف دولاب النظافه

بلاستيكاتك وزعيها حسب اهميتها ليكى

خلى باسكت الزباله جنب ايدك قدر الامكان

هتنظفى البوتاجاز وتمسحيه

وهتغسلى الحوض كويس وتنشفيه

وتمسحى الرخامه

وتمسحى المطبخ

وتفرشي مشايته

البلكونة

تركبى الاحبال وتحطى علبه المشابك ع جنب كده وفيهاالمشابك طبعا
ننفض الشيش طبعا كويس او ممكن نخليه مع تنفيض شيش وشبابيك الشقه كله
وبعدها نغسله بميه بس عشان ميجيرش
او ممكن تغسليه ع طول لو تحبى
وياسلام لو جايبه زرع هيديكى منظر كمان

وتمسحى البلكونه كويس وتقفليها

واخيرا ندخل ع الحمام

وهتبدئى بتنظيف البانيو و التواليت

ومسح السيراميك
وتلميع مرايه الحمام
وترصى الحجات على الاستاند بتاع الشامبوهات اللى ع جنب او المتعلق فوق
وطبعا هتكون ستاره الحمام والبانيو راكبه هتفرديهم كده
وهتبدئى تتشطفى انتى واللى معاكى عالسريع كده

وف الاخر اما تخلصوا تمسحوا الحمام بديتول
عشان التعقيم وتحطى ف التواليت ديتول واستنى اما الحمام ينشف شويه وافرشي طقم الحمام

واقفلى الحمام
وكده تقريبا خلصنا فرش الشقه وهتكون واقفه على فرش السرير والسجاد لوكنتى لسه مبقياه للاخر

واخيرا

قبل ماتمشوا بقى لموا كل متعلقاتكم من اكل وادوات نظافه وورتبوا مكانكم

وبخروا الشقه وشغلى اذاعه القران الكريم

واقفلى شقتك ياعروسه

طريقة فرش شقة العروسة

طريقة فرش شقة العروسة شقة صغيرة


 

اعداد / أمل رجب

 

Load More In ديكور المنزل

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Check Also

اهمية شرب زيت الزيتون للحامل

ما هى أهمية شرب زيت الزيتون للحامل ولماذا ينصح للحامل بتناول زيت الزيتون بشكل يومي على الر…